Tanınmış alim və təbib, Əməkdar elm xadimi, “Şöhrət” ordenli, tibb elmləri doktoru, professor, AMEA-nın həqiqi üzvü Böyükkişi Ağa oğlu Ağayev 10 sentyabr 1928-ci ildə Zərdab rayonunun Əlvənd kəndində anadan olmuşdur. O, 1949-cu ildə Azərbaycan Dövlət Tibb İnstitutunun Müalicə fakültəsini bitirib.
Böyükkişi Ağayev 1957-ci ildə namizədlik və 1966-cı ildə elmlər doktoru dissertasiyalarını müdafiə etmiş, 1968-ci ildə professor elmi adına layiq görülmüşdür. Tibb elmində və kadr hazırlığında əldə etdiyi mühüm nailiyyətlər nəzərə alınaraq tanınmış alim 1980-ci ildə Azərbaycan SSR EA-nın müxbir və 1989-cu ildə həqiqi üzvü seçilmişdir.
Böyükkişi Ağayev 1949-cu ildə Tibb İnstitutunu bitirdikdən sonra, 6 ay müddətində akademik M.M.Mirqasımovun rəhbərlik etdiyi Cərrahiyyə kafedrasında təkmilləşmə keçmiş, 1950-54-cü illərdə Sabirabad rayon xəstəxanasında həkim-cərrah kimi çalışmışdır. O, Həştərxan Tibb İnstitutunun Cərrahiyyə kafedrasının assisenti (1958-60), Azərbaycan Səhiyyə Nazirliyinin ET Onkologiya İnstitutunun Cərrahiyyə şöbəsinin baş elmi işçisi və şöbə müdiri (1960-67) vəzifələrində çalışmışdır.
Böyükkişi Ağayev Azərbaycan Tibb Universitetinin Cərrahiyyə kafedrasının müdiri (1973), ET Qastroenterologiya İnstitutunun (1988), akademik M.A.Topçubaşov adına Elmi Cərrahiyyə Mərkəzinin direktoru (1999-2018) olmuşdur.
Elmi fəaliyyətinin əsas istiqamətini hepotobiliar cərrahiyyə, əsasən qara ciyər, öd yolları, mədəaltı vəzi, həzm sistemi orqanlarının və başqa cərrahi xəstəliklərin diaqnostikası və müalicəsi təşkil etmişdir. Cərrahi əməliyyatlarla əlaqədar orqanizmin immun sistemindəki dəyişikliklərin nizamlanması, müxtəlif orqanların funksional fəaliyyətinin müəyyənləşdirilməsi sahəsində alimin eksperimental nəticələr əsasında təcrübi tövsiyələri və ixtiraları dünya tibb elminin yeniliklərindən olmuşdur. Öd yollarında aparılan bir sıra rekonstruktiv və bərpaedici əməliyyatların təkmilləşdirilməsində və praktiki olaraq tətbiqində böyük xidmətləri ilə tanınmışdır. Beynəlxalq aləmdə nüfuz qazanmış cərrah-klinisist Böyükkişi Ağayevin Azərbaycanda mədə-bağırsaq orqanlarının cərrahi müalicəsinin inkişafında və tibb kadrlarının hazırlanmasında xidmətləri böyükdür.
Böyükkişi Ağayev 400-ə qədər elmi əsərin, 12 monoqrafiya, “Cərrahi əməliyyatlar atlası”nın (2013), dərsliklərin və 8 ixtiranın müəllifi olub. O, mötəbər beynəlxalq elmi tədbirlərdə etdiyi məruzələrilə Azərbaycan tibb elmini layiqincə təmsil edib.
Alimin elmi rəhbərliyi və məsləhətçiliyi ilə tibb üzrə 52 elmlər namizədi və 9 elmlər doktoru hazırlanıb.
Böyükkişi Ağayevin ictimai fəaliyyəti də səmərəli olub, o, bir sıra beynəlxalq elmi cəmiyyətlərin üzvü və 12-ci çağırış Azərbaycan Ali Sovetinin deputatı seçilib.
Böyükkişi Ağayev Azərbaycanın “Əməkdar elm xadimi” (1979) fəxri adına layiq görülmüş, Azərbaycan Respublikasının “Şöhrət” ordeni (1998), AR Səhiyyə Nazirliyinin “Akademik M.A.Topçubaşov” və AMEA-nın “Akademik Mirəsədulla Mirqasımov adına” mükafatları ilə təltif edilmişdir. Azərbaycan Respublikasının “Nizami Gəncəvi adına qızıl medalı”, ABŞ Biblioqrafiya Mərkəzinin qızıl medalı (1997) və fəxri fərmanlarla mükafatlandırılmışdır.
Akademik Böyükkişi Ağayev 4 aprel 2018-ci ildə Bakı şəhərində vəfat etmişdir.
Böyükkişi Ağayevin əziz xatirəsi ölkənin elmi ictimaiyyətinin, elmi məktəbinin davamçılarının və bütün onu tanıyanların qəlbində əbədi yaşayacaqdır.
www.science.gov.az
