AZƏRBAYCAN MİLLİ                  ELMLƏR AKADEMİYASI
BİOLOGİYA VƏ TİBB ELMLƏRİ BÖLMƏSİ
Foto
Genetik Ehtiyatlar İnstitutu ilə Pakistanın Molekulyar Biologiya Mükəmməllik Mərkəzi arasında əməkdaşlıq müqaviləsi imzalanıb
Avg 26, 2022 | 02:03 / Mühüm hadisələr
Oxunub 26 dəfə

Genetik Ehtiyatlar İnstitutunun (GEİ) baş direktoru, AMEA-nın müxbir üzvü Zeynal Əkpərov və Pakistanın Punjab Universitetinin Molekulyar Biologiya Mükəmməllik Mərkəzinin direktoru, professor Kausar Maliki arasında elm, təhsil və texnologiya sahəsində əməkdaşlıq müqaviləsi imzalanıb.

Müqaviləyə əsasən, hər iki müəssisə tədqiqat və təhsil proqramlarının mübadiləsi, yeni təhsil proqramlarının hazırlanması, konfrans və seminarların keçirilməsi, yerli və beynəlxalq elmi tədqiqat layihələrinin işlənilməsi, magistrant, doktorant, eləcə də professor-müəllim heyətinin mübadiləsi, birgə magistrant və doktorant hazırlığı, yüksək texnologiyalardan istifadə etməklə birgə tədqiqatların aparılması, yeni bitki sortlarının yaradılması və beynəlxalq məqalələrin hazırlanması sahələrində əməkdaşlıq edəcəklər.

AMEA-nın müxbir üzvü Zeynal Əkpərov qeyd edib ki, GEİ-nin Elm və Təhsil Nazirliyinin tərkibinə verilməsi nəticəsində dünyanın tanınmış universitetləri ilə elm və təhsil sahəsində əməkdaşlığın genişləndirilməsi, eləcə də yüksəkixtisaslı kadrların hazırlanması sahəsində ikili diplom proqramlarının yaradılması üzrə geniş imkanlar açılıb: “Bu imkanlardan istifadə etməklə institutda təhsillə bağlı fəaliyyətlər daha da genişləndiriləcək, magistr və doktorant hazırlığı sahəsində dünyanın yüksək reytinqli universitetlərinin təcrübəsindən geniş istifadə ediləcək, beynəlxalq təhsil proqramlarına qoşulmaq üçün addımlar atılacaq, eləcə də Pakistanın Punjab Universiteti ilə biologiya elminin müasir istiqamətlərində ikili magistr və doktorluq proqramlarının hazırlanması həyata keçiriləcək”.

Z.Əkpərov GEİ-nin ilk dəfə olaraq dost Pakistanın elmi təşkilatı ilə müqavilə imzaladığını vurğulayaraq bu müqavilənin planlaşdırılan sahələrdə elmi əməkdaşlığın güclənməsinə təkan verəcəyinə əminliyini ifadə edib.

Professor K.Maliki GEİ-də mövcud olan müasir elmi infrastrukturu, kadr potensialını, aparılan tədqiqatları, əldə edilən elmi nəticələri, eləcə də təhsil sahəsində İnstitutun fəaliyyətini yüksək qiymətləndirib. Əlavə edib ki, hazırda İslam İnkişaf Bankının dəstəyi ilə Genetik Ehtiyatlar İnstitutu ilə birgə həyata keçiriləcək layihə çərçivəsində GEİ ilə əməkdaşlıq əlaqələri daha da genişləndiriləcək. Professor K.Maliki imzalanan əməkdaşlıq müqaviləsinin əhəmiyyəti və planlaşdırılan fəaliyyətlərin vaxtında icra edilməsinin elm və təhsil sahəsində ciddi nailiyyətlərin əldə edilməsinə şərait yaradacağına inamını ifadə edib. O, Molekulyar Biologiya Mükəmməllik Mərkəzinin professor-müəllim heyətinin elm və təhsil sahəsində GEİ ilə həvəslə əməkdaşlıq etmək niyyətində olduğunu diqqətə çatdırıb.

Qeyd edək ki, görüşdə İslam İnkişaf Bankı, Molekulyar Biologiya Mükəmməllik Mərkəzi və Genetik Ehtiyatlar İnstitutunun əməkdaşları iştirak ediblər.

 www.science.gov.az 

Copyright © AMEA İnformasiya Texnologiyaları İnstitutu, 2015